Beter waarde vir R550 per maand

Die Nasionale Padagentskap (SANRAL) het motoriste verseker dat die hoogste bedrag wat maandeliks aan tolgeld gehef sal word - mits hulle met 'n gewone motor ry - R550 gaan beloop.

Dis goeie nuus, sê Berry Everitt, besturende direkteur van die Chas Everitt International Property Group, aangesien die meeste pendelaars in Gauteng, selfs met 'n e-kaartjie, andersinds meer sou moes betaal. As die beperking nie gegeld het nie, sou dit teen 30c per kilometer byvoorbeeld minstens R720 per maand kos om daagliks tussen Pretoria en Johannesburg vir werk te pendel.

"Maar selfs R550 per maand - of R6600 per jaar - is 'n stewige som geld as die gemiddelde huishoudelike begroting in aanmerking geneem word. Daar is onlangs berig dat mense elke maand kos op krediet koop en dis geen wonder nie aangesien 'n Suid-Afrikaanse gesin wat R18 000 per maand verdien na beraming bykans R13 000 aan behuising (verband of huur) en afbetaling van skuld bestee.

"Dit laat net R5000 per maand vir kos, vervoer, water en krag, skoolgeld en ander noodsaaklikhede oor en die koste van dié items styg baie vinniger as die amptelike inflasiekoers. Die prys van basiese voedsels, soos melk, brood en mieliemeel het volgens Food Price Monitor die afgelope jaar met tot soveel as 56% gestyg; die petrolprys (in Gauteng  het sedert Januarie vanaf R10,43 per liter tot R11,97 'n liter toegeneem, en Eskom het die prys van elektrisiteit in Julie met 16% verhoog."

Met ander woorde, sê hy, R550 per maand kan 'n groot verskil aan die meeste mense se maandelikse begrotings maak. "Ons stel voor dat veral mense met jong gesinne nie net goedsmoeds moet aanvaar dat hulle maar vir tolgeld sal moet opdok nie, en eerder dadelik moet begin om planne te maak om voortaan openbare vervoer te gebruik.

"En as hul woonbuurt nie openbare vervoer bied nie, raai ons hulle aan om dadelik na 'n voorstad waar dit wel beskikbaar is, te verhuis - selfs al is die huurgeld of verbandbetaling effens hoër."

Die rede is, sê Everitt, dat verbruikers wat na skole en winkels kan stap en openbare vervoer kan benut om by die werk te kom meer as die R550 maandelikse tolgeld kan bespaar. Hulle sal ook bespaar op die loopkoste van 'n motor (insluitende petrol, diens, versekering en bande) wat volgens die AA nou sowat R2,41c per kilometer vir 'n beskeie 1600cc sedan beloop.

"Sulke besparings kan met vrug aangewend word om skuld wat hoë rente dra, soos krediet- en winkelkaarte, af te betaal en dan vir 'n deposito op 'n huis te spaar, of om elke maand 'n bykomende bedrag in 'n bestaande verbandrekening te betaal en so duisende rande in rente te bespaar."